Saturday, January 29, 2011

ကြယ်နှစ်စင်းကတဲ့ ကြိုးညှိသံစဉ်



လောကမှာ နှလုံသားတစ်စုံ ပေါင်းစပ်လိုက်လျှင် သူ့နောက်တွင် ဝမ်းသာပျော်ရွှင်ဖွယ်ရာများလည်း ရှိ၏။ ကြေကွဲခြင်းအချို့လည်း ပါနိုင်သည်။ အသွင်သဏ္ဍာန်မတူ ဆန့်ကျင်ဘက် လာရာများလည်း ပါနိုင်သည်။ တူညီသော ဝါဒအချို့လည်းရှိသည်။ အငြင်းအခုန် တိုက်ပွဲများလည်း ဖြစ်နိုင်သည်။ အဆင့်အတန်း ဂုဏ်ပကာသန တိုင်းတာခြင်း ပေတံလည်း ရှိနိုင်သည်။ လိုအပ်မှု၊ မလိုအပ်မှု ကဲ့သို့ ဒွိဟတရားများလည်း ရှိနိုင်သည်။ 

အချစ်သည် ကဗျာတွေ၊ စာတွေထဲတွင်သာ ခြယ်မှုန်းသီဖွဲ့၍ကာ ကောင်းသည်။ ရုပ်ရှင်တွေ၊ စာတွေထဲကလို စိတ်ကူးယဉ် အချစ်ဇာတ်လမ်းတွေသည်ကား ဒေါင်းယောင်ဆောင်သောကျီးပင်။ တကယ့် လက်တွေမူကား အရာရာခြားနားလှ၏။ ရိုးသားစွာ ဆိုရလျှင်မူ အချစ်၏ နောက်ဆက်တွဲ ကောင်းခြင်း ဆိုးခြင်းသည် ကံကြမ္မာ တစ်ရပ်ပင်တည်း။ 

လွန်စွာမှပင် ချစ်ကြပါသည်ဆိုသော အတွဲ နောက်ပိုင်း ကွဲချင်လဲ ကွဲနိုင်သည်။ မုန်းချင်လဲ မုန်းသွားနိုင်သည်။ သေတပန် သက်တဆုံး လက်တွဲ၍လည်း သွားနိုင်သည်။ အချစ်သည် အခြေအနေနှင့် အချိန်အခါ ပေါ်တွင်လည်း သက်ရောက်မှု ရှိသည်။ အတော်ပင် ညှိယူရသော မေတ္တာနှောင်ကြိုးများ ဖြစ်သည်။

အချစ်သည် သက်တမ်းရင့် လာသည်နှင့်အမျှ အေးဆေးတည်ငြိမ် လာတတ်ပြီး ရယူလိုခြင်း နေရာတွင် ပေးစပ်လိုခြင်း သဘောများ အစားထိုးဝင် ရောက်လာနိုင်သည်။ ပိုင်ဆိုင်လိုခြင်းနေရာတွင် မျှဝေခံစားလိုခြင်း ရှိလာနိုင်သည်။ သဘာဝ နိရာမအရပင် မတူညီသော လူသားဖိုမနှစ်ဦး တူညီအောင်ကြိုးစားလာခဲ့ခြင်းကို အိမ်ထောင်မှု ပြုသည်ဟု ထင်မြင်မိပါသည်။

♎♌♎♌♎♌♎♌♎♌


သူမသည် "လစ်ဘရာ" ဖြစ်၏။ သူသည် "လီယို" ဖြစ်၏။
သူမသည် ချိန်ခွင် ဖြစ်၏။ သူသည် ခြင်္သေ့ ဖြစ်၏။
သူမသည် စရ(လေ) တူရာသီ ဖြစ်၏။ သူသည် ထိရ(မီး) သိဟ်ရာသီ ဖြစ်၏။
သူမထံတွင် သောကြာကြယ် က၏။ သူထံတွင် တနင်္ဂနွေကြယ် က၏။

ထိုသို့ လစ်ဘရာဖြစ်သူ...... "သူမ"နှင့် လီယိုဖြစ်သူ...... "သူ" တို့တွင် -

သူမကား..... ပိန်၏။ သူကား...... ဝ၏။
သူမက..... စိတ်မြန်၏။ သူက..... စိတ်အေး၏။
သူမသည်..... လေ ဖြစ်၏။ သူသည်..... ဖယောင်းတိုင် ဖြစ်၏။
သူမက..... စိတ်ကူးယဉ်၏။ သူက..... လက်တွေ့ဆန်၏။
သူမ...... စိတ်ရှုပ်ခံ၏။ သူ..... စိတ်အရှုပ်မခံ၏။
သူမသည်...... ပေးဆပ်သူ ဖြစ်၏။ သူသည်..... ရယူလိုသူ ဖြစ်၏။
သူမ..... ငါးကြိုက်၏။ သူ...... အသားကြိုက်၏။
သူမကား...... ရုပ်ရှင် နှစ်သက်၏။ သူကား...... စာပေ နှစ်သက်၏။

ထိုထိုသော ဆန်ကျင်ဘက်များနှင့် အပြိုင် ………


သူမသည်..... ညို၏။ သူလည်း...... ညို၏။
သူမသည်..... ကခုန်ခြင်း ကြိုက်၏။ သူလည်း..... ကခုန်ခြင်း ကြိုက်၏။
သူမသည်..... အပေါင်းအသင်း ခုံမင်၏။ သူသည်လည်း..... အပေါင်းအသင်း ခုံမင်၏။
သူမသည်..... အပြာရောင် နှစ်သက်၏။ သူလည်း..... အပြာရောင် နှစ်သက်၏။
သူမသည်..... ပန်းချီကို စိတ်ဝင်စား၏။ သူလည်း..... ပန်းချီကို စိတ်ဝင်စား၏။
သူမသည်..... ဂီတကို ခုန်မင်၏။ သူလည်း..... ဂီတကို ခုန်မင်၏။

ဤသို့သော အချက်များသည်လည်း သူမနှင့်သူတွင် လားရာတူ၏။

သူမနှင့် သူ၏ ဆန်ကျင်ခြင်း နှင့် တူညီခြင်း မျဉ်းပြိုင်နှစ်ကြောင်းသည် အင်ဖန်နတီဆိုသော အိမ်ထောင်ဘက်အရပ်၌ သွားဆုံသောအခါ…………..။

ရံဖန်ရံခါ အချိန်များတွင်-
သူမနှင့် သူသည် အရမ်း နားလည်မှု ရှိကြလေ၏။
သူမနှင့် သူသည် ကသိကအောင့် ရှိကြလေ၏။
သူမနှင့် သူသည် စွယ်တော်ရွက် ဖြစ်လေ၏။
သူမနှင့် သူသည် Tom နှင့် Jerry ဖြစ်လေ၏။
သူမနှင့် သူသည် Romeo နှင့် Juliet ဖြစ်လေ၏။

သူမက အချစ်ကို ပေးစပ်ခြင်းတုံပြန်ခြင်းနားလည်းခြင်းအားကိုးခြင်း ဟုနားလည်သည်။
သူက အချစ်ကို ရယူခြင်း ငြိမ်းချမ်းခြင်းယုံကြည်ခြင်းစွမ်းအားရှိခြင်းခွင့်လွှတ်ခြင်း ဟုခံစားသည်။

လစ်ဘရာဘဝ ထဲက လီယို၊ လီယိုဘဝထဲက လစ်ဘရာ (လေထဲက ဖယောင်းတိုင်) 



သူနှင့် သူမ ပေါင်းစည်းခြင်းသည် ရာသီစက်ဝန်း တစ်ခုပြီးတစ်ခု လည်ပတ်လာခဲ့ပြီး မိုင်တိုင်များ တရွေ့ရွေ့ ဖြစ်ကျော်လာခဲ့ပေရာ နွေသဏ္ဍာန် ခြောက်ကြိမ်၊ ဆောင်းပမာ ခြောက်လီ၊ မိုးအသွင် ခြောက်ခါ ရောက်နှင့်လေသည်။ သူမသည် သူ့အတွက် နားလည်းပေးနိုင်သူ၊ သည်းခံနိုင်သူ၊ မျှတသူ၊ အလိုလိုက်သူ အဖြစ် ရှင်သန်၏။ သူသည် သူမအတွက် အားပေးသူ၊ ဖေးမသူ၊ စာနာတတ်သူ၊ သဘောထားကြီးသူ အဖြစ် ရပ်တည်၏။ သူမနှင့်သူ ဆုံဆည်းမှုမှ သူတို့ထပ်တူ နောက်ထပ် သိဟ်နှင့်တူ ရာသီ ကြယ်ပွားလေးနှစ်စင်း ဖျာထွက် ယှက်နွယ်လာလေသည်။ ဘဝဇာတ်ခုံပေါ်မှ ကြယ်နှစ်စင်းကတဲ့ သံစဉ်ကတော့ မလျော့မတင်းတဲ့ စောင်းကြိုးညှင်းပါပဲ။

♎♌♎♌♎♌♎♌♎♌

ဆန့်ကျင်မှု ဆိုတာ တကယ်တမ်းတော့ ကျောခိုင်းထားမိခြင်း သက်သက်ပါ။ တဖန်ပြန်လှည့်ပြီး မျက်နှာချင်းဆိုင် ကြည့်ရင်တော့ ထပ်တူညီမည့် ရင်ခုန်သံတိုးတိုးလေးကို ကြိမ်ဖန်များစွာ ကြားနေရပါလိမ့်မည်။



(ခြောက်နှစ်မြောက် မင်္ဂလာရက်မြတ်ဆီသို့....)


ဆက်လက်ကြိုးစားပါဦးမည်။
© ချမ်းလင်းနေ

4 comments:

  1. ၆နှစ်ပြည့် မင်္ဂလာမှသည်.. နှစ်ပေါင်းရာကျော်တိုင်ပါစေ..
    ချစ်ခင်မြတ်နိုးခြင်း နားလည်ယုံကြည်ခြင်းတို့ဖြင့် တွဲလက်ခိုင်ခိုင်မြဲနိုင်ကြပါစေရှင်။

    ReplyDelete
  2. သက်ထက်ဆုံး ပျော်ရွှင်ချမ်းမြေ့တဲ့ ဘဝလေးပိုင်ဆိုင်နိုင် ပါစေ ကိုချမ်းရေ

    မောင်ဘကြိုင်

    ReplyDelete
  3. ယနေ့မှစနှစ်တစ်ရာတိုင်...

    ReplyDelete
  4. (၆)နှစ်ပြည့် မင်္ဂလာရက်မြတ်မှ သက်ဆုံးတိုင် ထာဝရခိုင်မြဲသော ဘဝလေးကို ပိုင်ဆိုင်ပါစေ..ကိုချမ်းရေ..။
    Happy Wedding Anniversary ...ပါရှင်

    ReplyDelete